'கோபுரத்தில் இருந்து கோட்டைக்கு குதிக்க ரஜினிகாந்த், கமல்ஹாசன் முயற்சி' -இயக்குனர் கவுதமன் தாக்கு

கோபுரத்தில் இருந்து கோட்டைக்கு குதிக்க ரஜினிகாந்த், கமல்ஹாசன் முயற்சி செய்கிறார்கள் என்றும், அன்னை தெரசா போல் சேவை செய்யுங்கள் என்றும் இயக்குனர் கவுதமன் கூறினார்.

கவுதமன் பேட்டி

திரைப்பட இயக்குனர் கவுதமன் தேனியில் நேற்று நிருபர்களுக்கு பேட்டி அளித்தார். அப்போது அவர் கூறியதாவது-

முல்லைப்பெரியாறு அணையில் தமிழகத்தின் உரிமையை நிலைநாட்ட வேண்டும் என்பதற்காக கடந்த 2011-ம் ஆண்டு தேனியை சேர்ந்த ஜெயப்பிரகாஷ் நாராயணன் என்ற வாலிபர் தீக்குளித்து இறந்தார். எதற்காக அவர் உயிரை தியாகம் செய்தாரோ அந்த கோரிக்கை இன்று வரை நிறைவேறவில்லை. அணையின் நீர்மட்டத்தை 152 அடியாக உயர்த்துவதற்கு எந்தவிதமான நடவடிக்கையும் எடுக்கப்படாமல் உள்ளது.
அதே நேரத்தில், முல்லைப்பெரியாற்றில் புதியஅணை கட்டுவதற்கு ஆய்வுப் பணிகளை மேற்கொள்ள கேரள அரசுக்கு மத்திய வனம் மற்றும் சுற்றுச்சூழல் அமைச்சகம் அனுமதி வழங்கி உள்ளது. இது தமிழகத்துக்கு மத்திய அரசு செய்யும் துரோகம்.
காவிரியின் குறுக்கே மேகதாது அணை கட்டுவதற்கும் மத்திய வனம் மற்றும் சுற்றுச்சூழல் துறை கர்நாடக அரசுக்கு அனுமதி வழங்கி உள்ளது. மத்திய அரசு தொடர்ந்து தமிழ் இனத்துக்கு துரோகம் செய்து வருகிறது. எங்களின் ஒரே நம்பிக்கை சுப்ரீம் கோர்ட்டு தான். சுப்ரீம் கோர்ட்டு உத்தரவுகளை மீறி அணைகள் கட்டுவதற்கான ஆய்வுப் பணிகளை மேற்கொள்வதால் கோர்ட்டு தானாகவே முன்வந்து இந்த வழக்கை பதிவு செய்து தமிழக மக்களின் நலனை பாதுகாக்க வேண்டும்.

மிகப்பெரிய போராட்டம்

அரியலூரில் விடுதலைப் புலிகள் தலைவர் பிரபாகரன் புகைப்படத்துடன் கூடிய காலண்டர் விற்பனை செய்ததாக கூறி புத்தக கடை நடத்தும் இளவரசன் என்பவரை கைது செய்தது கண்டிக்கத்தக்கது. அதே அரியலூரில் மணல் திருட்டு தொடர்ந்து நடப்பதை போலீசார் கண்டு கொள்வது இல்லை. சிமெண்டு ஆலைகளால் அங்குள்ள விளை நிலங்கள் பாழாகி விட்டன. நிலக்கரி எடுப்பதற்கு மேலும் 20 கிராமங்களை அழிக்கப் பார்க்கிறார்கள்.
தூத்துக்குடியில் 14 பேரை போலீசார் துப்பாக்கியால் சுட்டுக் கொன்ற பின்னர், ஸ்டெர்லைட் ஆலை நிரந்தரமாக முடப்படும் என்று முதல்&அமைச்சர் அறிவித்தார். இப்போது பசுமைத்தீர்ப்பாயம் ஸ்டெர்லைட் ஆலையை திறக்க ஈவு, இறக்கமின்றி அனுமதி அளித்துள்ளது. அந்த ஆலையை அங்கிருந்து நிரந்தரமாக அப்புறப்படுத்த வேண்டும். எல்லையெனில், ஜல்லிக்கட்டுக்கு போராடியது போல் தமிழக இளைஞர்கள் மிகப்பெரிய அளவில் போராட்டங்களை நடத்தும் நிலைமை உருவாகும்.

அரசியல் கட்சி

நல்லவர்கள் ஆட்சி செய்தால் போராட வேண்டிய தேவையே வராது. ஆகவே அரசியல் எனும் ஆயுதத்தை நாங்கள் கையில் எடுக்கப் போகிறோம். இதற்காக விரைவில் கட்சி தொடங்க உள்ளோம். நாங்கள் திடீரென கருப்புத் துண்டு போட்டு, ஏழைகளை கட்டிப் பிடித்து படம் பிடித்துக் கொண்டு அரசியலுக்கு வரவில்லை. பல ஆண்டுகளாக மக்களோடு களத்தில் நின்று போராடி, மண்ணுக்காக குரல் கொடுத்து வருகிறேன். திட்டமிட்டு அழிக்கப்படும் தமிழ் இனத்தை பாதுகாக்க வேண்டும் என்பதற்காகவும், மக்களின் பக்கம் வலுவான இயக்கமாக இருக்க வேண்டும் என்பதற்காகவும் அரசியல் கட்சி தொடங்குகிறோம்.
தங்களை வாழ வைத்த மக்களுக்கு நல்லது செய்யவே அரசியலுக்கு வருவதாக ரஜினிகாந்த், கமலஹாசன் கூறுகின்றனர். அவர்கள் கோபுரத்தில் இருந்து கோட்டைக்குள் குதிக்க பார்க்கிறார்கள். மக்களுக்கு நல்லது செய்ய வேண்டும் என்று விரும்பினால் அன்னை தெரசா போல் தொண்டு செய்யட்டும். பின்பு மக்கள் விரும்பி அழைத்தால் அரசியலுக்கு வாருங்கள்.
இவ்வாறு அவர் கூறினார்.

நன்றி: தினத்தந்தி
நாள்: 26-12-2018